Каждый верующий может обращаться к святому благоверному великому князю Александру Невскому с личной сокровенной молитвой, высказать ему свои горести, попросить помощи и заступничества. Заступник земли Русской почитаем православными по всему миру и, конечно, на Родине. Мы публикуем для вас текст молитв, тропарей, кондаков и величания святому.

Молитва св. блгв вл. кн. Александру Невскому

Скорый помощниче всех усердно к тебе прибегающих и теплый наш пред Господем предстателю, святый благоверный княже Александре! Призри милостивно на ны недостойныя многими беззаконии непотребны себе сотворшия, к раце мощей твоих ныне притекающия и из глубины сердца тебе взывающия: ты в житии своем ревнитель и защитник православныя веры был еси, и нас в ней теплыми твоими молитвами непоколебимы утвер­ди. Ты великое, возложенное на тя служение тщательно проходил еси, и нас твоею помощию пребывати коегождо, в нейже призван есть, настави. Ты, победив полки супостатов, от пределов Российских отгнал еси, и на нас ополчающихся всех видимых и невидимых врагов низло­жи. Ты, оставив тленный венец царства земнаго, избрал еси безмолвное житие, и ныне праведно венцем нетлен­ным увенчанный, на небесех царствуеши, ходатайствуй и нам, смиренно молим тя, житие тихое и безмятежное и к вечному Царствию шествие неуклонное твоим предстательством устрой нам. Предстоя же со всеми святы­ми Престолу Божию, молися о всех православных христианах, да сохранит их Господь Бог Своею благодатию в мире, здравии, и благоденствии, и всяком благополучии в должайшая лета, да и присно славим и благословим Бога, в Троице Святей славимаго Отца, и Сына, и Святаго Духа, ныне и присно и во веки веков. Аминь.

Тропари св. блгв вл. кн. Александра Невского

23 ноября/ 6 декабря (н.с.) — в день преставления

Глас 4

Яко благочестиваго корене/ пречестная отрасль был еси, блаженне Александре,/ яви бо тя Христос, яко некое Божественное сокровище Российстей земли,/ новаго чудотворца, преславна и богоприятна./ И днесь сошедшеся в память твою верою и любовию,/ во псалмех и пениих радующеся славим Господа,/ давшаго тебе благодать исцелений,/ Егоже моли спасти град сей,/ и державе Российстей/ богоугодней быти,// и сыновом Российским спастися.

30 августа/ 12 сентября (н.с.) — в день перенесения мощей

Глас 4

Познай свою братию, российский Иосифе,/ не в Египте, но на Небеси царствующий,/ благоверный княже Александре,/ и приими моления их,/ умножая жита людем плодоносием земли твоея,/ грады владычествия твоего ограждая молением// и православным христианом на сопротивныя споборствуя.

Кондаки св. блгв вл. кн. Александра Невского

23 ноября/ 6 декабря (н.с.) — в день преставления

Глас 4

Якоже сродницы твои Борис и Глеб/ явишася тебе с Небесе в помощь,/ подвизающемуся на Велгера Свейскаго и воев его,/ тако и ты ныне,/ блаженне Александре,/ прииди в помощь твоим сродником// и побори борющия ны.

30 августа/ 12 сентября (н.с.) — в день перенесения мощей

Глас 4

Яко звезду тя пресветлу, почитаем, от востока возсиявшую и на запад пришедшую,/ всю бо страну сию чудесы и добротою обогащаеши/ и просвещаеши верою чтущия память твою, Александре блаженне./ Сего ради днесь празднуем твое успение, людие твои сущии:/ моли спасти Отечество твое/ и вся притекающия к раце мощей твоих и верно вопиющия ти:// радуйся, граду нашему утверждение.

Величание

Величаем тя,/ благоверный княже Александре,/ и чтим святое успение твое,/ и ныне молиши за нас// Христа, Бога нашего.